Олунньу 7 күнүгэр Киин библиотека ааҕар саалатыгар Бүлүү фольклорун уонна ырыаһыттарын үйэтитээччи, тарҕатааччы СӨ култууратын үтүөлээх үлэһитэ, самодеятельнай композитор, Саха сирин ырыа айааччыларын сойууһун чилиэнэ Уйбаан Уйбаанабыс Тулааһынап 60 сааһын туолбутунан айар түһүлгэтигэр бэйэтин тула кэрэ куоластаах тойуксуттары, ырыа алыптаах доҕотторун муста. бу дьоро күҥҥэ Уйбаан Тулааһынап Бүлүү фольклорун үйэтитиигэ оҥорбут 20 компакт-диискэтин ааҕар балаҕаҥҥа бэлэхтээтэ. Дьоро күҥҥэ эҕэрдэ бастыҥа этилиннэ, ырыа-тойук дьиэрэйдэ, өрөгөй-талаан үрдээтэ. 

      "САХА СААРЫННАРА" конференция иһинэн ыытыллыбыт эдэр учуутал уһуйааччытынаан күрэһигэр Акулина Николаевна Петровалыын кыттан 1 миэстэни ыллыбыт. Акулина Николаевна 5 б кылааска кылаас таһынан ааҕыы уруогун ыытта. Көрдөрүүлээх уруокка учуутал сатабылын, оҕолору салайан үлэлэтэр дьоҕурун көрдөрөр сыаллаах ФГОС уруогун ыытыы методикатынан аныгы уруогу көрдөрдүбүт. Николай Якутскай "ОЙУУР ОСКУОЛАТА" айымньытынан уруогу урут үөрэтэн көрбөтөх, билбэт кылааһын оҕолоругар ыйыллыбыт 25 мүнүүтэҕэ ыытта уонна дьүүллүүр сүбэ үрдүк сыанабылын ылла. Акулина Николаевнаҕа ситиһиитинэн эҕэрдэ! Инникитин даҕаны үөрэтии үрдүк таһымнарын ситиһэригэр айымньылаах үлэни, ситиһиилээх үөрэнээччилэри, көҕүлүүр-бодоруһар биир санаалаах дьүөгэлэри баҕарабын! 

    Олунньу 1-2 күннэригэр "Саха саарыннара" улуустааҕы конференция оскуолаҕа буола турар. Бастакы күн дакылааттары истии уонна уолаттарга бөлөҕүнэн хоһоон ааҕыытын күрэҕэ буолла. Дакылаакка 10 оҕону, ааҕыыга 6 бөлөҕү бэлэмнээн киллэрдим. Бастакы күн түмүгүнэн оҕолору бэлэмнээһини бырыһыаҥҥа таһаардахха саамай намыһах хаачыстыбаны көрдөрбүт учуутал буоллум. Ол эрээри дакылаат ааҕыытыгар 5 кылаастарга Герасимова Виктория 2 миэстэ, 6-7 кылаастарга Тараховскай Василий 2 миэстэ буоллулар. Хоһоон ааҕыытыгар 8б уонна 9б кылаастар бөлөхтөрө "Кыайыыга дьулуурдарын иһин", 10б кылаас уолаттара "Дорҕоонноох ааҕааччы" анал ааттарга тигистилэр. Онон олох кураанах буолбатыбыт. Дакылаат да, ааҕыы да балаһыанньата этиллибит ирдэбилинэн сыаналаммыта буоллар, түмүк тахсыытыгар атын хартыына көстүө эбитэ буолуо... Ситиһиилээхтик кыттыбыт оҕолорбор эҕэрдэ! 

      Тохсунньу 18 күнүгэр саха норуодунай поэта, СР искусстволарын үтүөлээх деятелэ, РФ култууратын үтүөлээх үлэһитэ, Саха комсомолун бириэмийэтин лауреата, "Северная звезда" Россия литературнай бириэмийэтин лауреата, "Бочуот знага", "Дружба" уордьаннар кавалердара, Бүлүү улууһун бочуоттаах олохтооҕо И.М. Гоголев - Кындыл төрөөбүтэ 89 сылынан "Алгыс" сынньалаҥ киинигэр "Аар айылҕа сүдү тойуксута" диэн оскуоланы бүтэрээччилэргэ библиотечнай уруогу Г.С. Донской аатынан оскуола учуутала Докторова И.П. ыытта. Эһиил Кындыл үбүлүөйдээх сылыгар ыытыллар уруок бэлиэтэ биһиги оскуолабытыгар туттарылынна.   

     Тохсунньу 9-11 күннэригэр Дьокуускайга "Инникигэ хардыы" НПК республиканскай түһүмэҕэ буолан ааста. Биһиги оскуолаттан бу улахан тэрээһиннэ 11 кылаас үөрэнээччитэ Белых Тимур уонна 7 кылаас үөрэнээччитэ Васильев Борис кытыннылар. Борис "Археология уонна этнология" секциятыгар 3-с бириистээх миэстэҕэ тигистэ. Оксана Ивановнаҕа уонна Бориска ситиһиилэринэн эҕэрдэ!!!  

САҤА ДЬЫЛЫНАН!

    Ахсынньы 18-19 күннэригэр Ньурба куоратыгар регионнааҕы "ИННИКИГЭ ХАРДЫЫ" научнай конференция-конкурс буолан ааста. Биһиги улууспутуттан барыта 63 оҕо араас секцияларга кыттыбытыттан Дьокуускайга буолар республиканскай конференцияҕа 26 оҕо салгыы кыттар буолла. Ол иһигэр лауреат буолбут уонна бириистээх миэстэҕэ тиксибит оҕобут 12. Биһиги оскуолабытыттан 5 оҕо кыттыбытыттан Семенова А.П., Софронова Р.Н. салайааччылардаах Белых Михаил уонна Семенова Анна республикаҕа кыттарга мэктиэлэннилэр, Кычкина О.И. салайар оҕото Васильев Борис 2 миэстэ уонна мин салайан илдьэ сылдьыбыт оҕом Тараховскай Василий 3 миэстэ буоланнар балачча үрдүк ситиһиилээх эргиллэн кэллибит. Уопсай түмүккэ Бүлүү бириистээх миэстэҕэ тиксибит оҕото - 12, Ньурба - 32, Сунтаар - 32, Үөһээ Бүлүү - 33. оҕолорбут республика таһымыгар салгыы кытталларыгар ситиһиини баҕарабыт уонна түгэнинэн туһанан, региоҥҥа кыттыыбытыгар көлөнөн хааччыйбыт, ай ... Читать дальше »

     Ахсынньы 15 күнүгэр оскуолабыт ветерана, РСФСР үөрэҕириитин туйгуна, "За вклад в развитии Вилюйской школы" бэлиэ хаһаайката, Бүлүү улууһун үөрэҕириитин үлэһиттэрин "Серебряный звонок" күрэхтэригэр "Честь и достоинство" номинация кыайыылааҕа Николаева Лукерья Акимовна - Эбэ Лөкүөтэ "Киэн тутун, киэҥ Бүлүүм" диэн ааттаах хоһооннорун хомуурунньуга бэчээттэнэн тахсыбытын билиһиннэрэр дьоро күн буолла. Бу кинигэни СӨ үөрэҕириитин уонна култууратын туйгуна М.П.Сивцевалыын бэчээккэ бэлэмнээн, уолум П.Г. Муксунов ис-тас дизайнын оҥорон, автор кыыһа С.В. Николаева компьютерга таҥан үлэлээбиппитинэн тэрээһиҥҥэ авторы кытта тэҥҥэ долгуйдубут, бэлиэтэннибит, хайҕал-махтал тылларын ыллыбыт.    

      Сэтинньи 23-24 күннэригэр оскуолабыт 55 сыллаах үбүлүөйэ үрдүк тэрээһиннээхтик бэлиэтэннэ. Үбүлүөй тэрээһиннэригэр оскуола үөрэнээччилэрэ, төрөппүттэрэ, выпускниктара, үлэһиттэрэ өрө көтөҕүллэн туран уһуннук бэлэмнэммиттэрин түмүгэр икки күннээх үбүлүөй күннэрэ оскуоланы араас кэмнэргэ бүтэрбит выпускниктарын, үлэлии сылдьыбыт үлэһиттэрин түмтэ, бастыҥтан бастыҥнарын чиэстээтэ. Өрөгөйдөөх үбүлүөйүнэн оскуола айымньылаах коллективыгар баҕа санаа бастыҥа этилиннэ, үтүө санаа үтүмэнэ ананна.   

      Сэтинньи 24 күнүгэр саха тылыгар үөрэнээччилэр олимпиадаларын улуустааҕы түһүмэҕэ Г.С.Донской аатынан №2-дээх орто оскуолаҕа буолан ааста. Биһиги оскуолабыт чиэһин 9 кылаастан Николаева Аня, 10 кылаастан Катанова Айта көмүскээтилэр. Олимпиада түмүгүнэн Катанова Айта 3 бириистээх миэстэҕэ тигистэ. Айтаҕа олимпиадаҕа ситиһиитинэн эҕэрдэ!!!