Бу күннэргэ Европа Академиятын естественнэй наукаларын Академига, ССРС НА СО үтүөлээх ветерана, филологическай наука доктора, РФ уонна СР культуратын үтүөлээх үлэһитэ, Саха сирин комсомолун бириэмийэтин лауреата, Аан дойдуга Хомус киинин төрүттээччи, Дьокуускай куорат, Бүлүү, Эдьигээн улуустарын бочуоттаах олохтооҕо Иван Егорович Алексеев – Хомус Уйбаан 75 сааһын туолбутун төрөөбүт дойдутугар бэлиэтиир.

   Бүлүү куоратыгар кулун тутар 22 күнүгэр сарсыарда 10 чаастан саҥа суруйбут «Олох далайыгар» кинигэтигэр ааҕааччылар конференцияларынан, Бүлүү улууһун норуотун маастардарын уонна талааннаахтарын оҥоһуктарын быыстапката тэриллиитинэн үөрүүлээх тэрээһин бастакы күнэ Олонхо дьиэтигэр саҕаланна, күнүс И.Ф. Захаров аатынан Хомус дьиэтигэр «Бүлүүлүү сыыйа тардыыга» остуол тула кэпсэтии, киэһэтигэр «Алгыс» сынньалаҥ киинигэр юбиляры чиэстиир дьоро түгэн буолла.

    Иван Егорович Алексеев – Хомус Уйбаан юбилейыгар ыытыллыбыт тэрээһиннэр түмүктэрэ таҕыста. Кыайыылаахтар И.Е. Алексеевтан бириистэри тутан үөрдүлэр. Кыайыылаахтар ортолоругар биһиги оскуолабыт 7б кылааһын үөрэнээччитэ Игнатьев Гриша бэлиэтэннэ. Гришабытын ситиһиитинэн эҕэрдэлиибит.

     Иван Егорович Алексеев – Хомус Уйбаан юбилейдаах тэрээһиннэрэ салгыы биһигэ ыйаммыт Кыргыдайыгар, үөрэммит Эдьигээнигэр бэлиэтэниэхтэрэ. Сүдү талааныгар, киэҥ далааһыннаах, ыллыктаах, айымньылаах  үлэтигэр сүгүрүйээччилэр айанын алгыстаах аартыгар киэҥ саҕахтары, сырдык суолу баҕара хаалабыт.