Олунньу 26 күнүгэр Культура уонна искусство колледжын выпускнига, үөрэппит оҕом, Иван Васильев "Хохочой" диэн дипломнай үлэтин премьератын көрөөччү дьүүлүгэр таһаарыытыгар ыҥырыылаах ыалдьыт быһыытынан сырыттым. Спектакльга оскуола үөрэнээччилэрин, колледж студеннарын бэлэмнээн кытыннарбыта ситиһиилээхтик түмүктэннэ. Аныгы кэм технологиятынан историческай хаартыскалары туһанан, историческай чахчыларга олоҕуран туруоруллубут спектакль көрөөччүлэр уйулҕаларын хамсатардыы итэҕэтиилээхтик арылынна. Уотунан-күөһүнэн, музыканан киэргэтиитэ да табыллыбыт. Бүлүүтээҕи педколледж студена Василий Николаев Хохочой туһунан хоһооннору ордук долгутуулаахтык толорда. Сүрүн оруолларга оонньообут 9 кылаас үөрэнээччилэрэ Алексей Захаров,Никита Иванов да оруолларын сөптөөхтүк арыйдылар. Түмүккэ Иван Васильев спектакль туруутугар кыттыбыт үөрэнээччилэргэ, студеннарга, оҕолор кылаастарын салайааччыларыгар уонна үчууталларыгар ол иһигэр миэхэ эмиэ махтал суруктары туттартаата. Ваняҕа оҕолору дьарыктаан, бэлэмнээн, иитэр-үөрэтэр суолталаах спектаклы туруорбутун иһин харда тылы оскуола директора Волчок Т.И. эттэ уонна махтал сурук туттарда. Үөрэнээччибит дипломнай үлэтин сценаҕа туруорбутуттан үөрэн эҕэрдэ тылы Анна Прокопьевна Сыромятникова этэн туран оскуола юбилейыгар хомуйан таһаарбыт кинигэтин кытта иккиэн кыттыспыт кыракый бэлэхпитин туттарда. Дьоро күн хаартыскаҕа түһүүнэн түмүктэннэ. Үөрэнээччибитигэр дипломун этэҥҥэ көмүскүүрүгэр уонна айар үлэ аартыгынан айанныырыгар киэҥ суолу баҕарабыт!