Олунньу ый 18-19 күннэригэр Үөһээ Бүлүүгэ «Үөһээ Бүлүү улууһа» Муниципальнай оройуон уонна үөрэҕириитин салалтата, СР «Олоҥхо Ассоциацията» общественнай тэрилтэ, М.К.Аммосов аатынан ХИФУ Олоҥхону чинчийэр института, М.А.Алексеев аатынан республикатааҕы лиссиэй-интэринээт тэрийиилэринэн «ОЛОҤХО ТЫЛА – ИЙЭ ТЫЛ» диэн Ийэ тылы сөргүтэр, харыстыыр, сайыннарар аналлаах норуот тылынан уус-уран айымньыта – Олоҥхо тылынан-өһүнэн омук төрүт үгэһин, култууратын, устуоруйатын, итэҕэлин, философиятын, уйулҕатын, иҥэриммит билиитин чөмчөлүүр уонна иитии-үөрэтии тиһигэр киллэрэр суоллары, ньымалары тобулар, чинчийэр сыаллаах-соруктаах, республика ыраах-чугас улуустарыттан үгүс киһи кыттыылаах, олус сэргэх тэрээһиннээх республикатааҕы научнай-методическай форум буолла. Форум 14 олугунан элбэх учуонай салайыытынан үлэлээтэ, «Сатабыл» быыстапка-дьаарбаҥка тэрилиннэ, маастар-кылаастар буоллулар.
Бу тэрээһиҥҥэ уопсайа 600 тахса киһи 11 улуустан кэлэн кытыннылар. Ол иһигэр дакылааччыта – 260, 120 - быыстапка кыттыылааҕа, 20 наука кандидата, доктора эксперт быһыытынан үлэлээтилэр. Ону таһынан улуус, республика 15 учуутала аныгы ирдэбилгэ эппиэттиир үрдүк таһымнаах аһаҕас уруоктары, маастар-кылаастары ыытта.
Бастакы күн сарсыарда 9.00 чаастан Форум ыҥырыылаах экспертэрэ Үөһээ Бүлүү улууһун Баһылыгын Поскачин В.С. кытта администрация дьиэтигэр көрсүһүүлэриттэн уонна лиссиэй-интэринээккэ Форум кыттыылаахтарын көрсүү сиэриттэн-туомуттан саҕаланна. Бу күн уопсайа 14 олугунан ОЛОҤХО уонна ИЙЭ ТЫЛБЫТ тула бэрт элбэх, баай ис хоһоонноох тэрээһиннэр ыытылыннылар. Форум кыттыылаахтара сарсыардаттан аһаҕас дьарыктары, тэрээһиннэри көрдүлэр, эбиэт кэннэ дьарыктары ырытыы, саха тылын уонна учууталларын кууруһун түмүктүүр төгүрүк остуол тэрилиннэ. Норуот маастардарын быыстапкатыгар мас, тимир, сиэл, таҥас уо.д.а матырыйааллартан оҥоһуллубут экспонаттар республика араас муннуктарыттан тиийэ кэлбиттэр. Манна дьон сэҥээриитин ылла Мандар кыһатын тимир уустарын быыстапката. Маастардар кэлбит ыалдьыттарга, оҕолорго араас маастар-кылаастары көрдөрдүлэр. Олор истэригэр кумааҕынан пластика, чаппарааҕы аныгылыы тигии, мас, муос, тимир, кыл, сиэл оҥоһуктары оҥоруу уо.д.а. Лиссиэй-интеринээт иһинэн ыытыллыбыт тэрээһин кыттыылаахтарын сынньалаҥ кэмнэригэр хаһаайын-оскуола оҕолоро бэрт сэргэх кэнсиэринэн аралдьыттылар. Форум үөрүүлээх арыллыыта П.Н. Тобуруокап аатынан Сынньалаҥ Киинигэр ыытылынна. Манна Сахаайта Мойтохонова Олоҥхо оскуолатын айар киэһэтэ тэрилиннэ. Бу күн олуктар баай ис хоһоонноох, элбэх саҥа саҕахтардаах маннык темаларынан тэрилиннилэр:
Иккис күн олунньу 19 күнүгэр оскуола аактабай саалатыгар ОЛОҤХО – ОЛОХ ОҤКУЛА. ОЛОҤХО ТЫЛА – ИЙЭ ТЫЛ ОЛУГА аһаҕас кэпсэтии буолла. Аһаҕас кэпсэтиигэ кыттыыны ыллылар М.П. Алексеев-Дапсы Мэхээлэ, филол.наука кандидата, Г.Г. Филиппов, филол. наука доктора, В.С. Долгунов, пед.наука доктора, В.Р. Шишигина, ИРОиПК төрөөбүт тыллар кафедраларын сэбиэдиссэйэ, Е.И. Избекова, Аал Лук Мас редактора, филолог. наука кандидата, Л.И. Егорова, ист.наука кандидата уонна да атыттар.
ОҔОНУ-ЫЧЧАТЫ КЫТТА ИҺИРЭХ КЭПСЭТИИ түһүмэххэ В.Д. Михайлов, философ. наука доктора П.Н. Николаев, “Знание”общество салайааччыта үөрэнээччилэри кытта көрүстүлэр, САХА ОМУК ТӨРҮТ ХАМНАНЫЫТА түһүмэххэ кытта Үөһээ Бүлүүгэ ыытыллыахтаах кэлэр Манчаары оонньууларыгар бэлэмнэнии быһыытынан үҥкүү учууталларыгар маастар-кылаастар буоллулар.
Бу күн эбиэттэн киэһэ Кэнтик орто оскуолатын Чап уустарын музейыгар, Олоҥхо оскуолатыгар, олоҥхоһут Кирилл Никонович Никифоров-Лөкөчөөн Арчытын Дьиэтигэр ыалдьыттааһын тэрилиннэ.
Форум иккис күнэ РЕЗОЛЮЦИЯ ЫЛЫНЫЫТЫНАН уонна ТҮӨРТ БҮЛҮҮ ТҮБЭТИН ОЛОҤХОҺУТТАРЫН ТҮҺҮЛГЭТЭТИНЭН түмүктэннэ.
        
|
