Алтынньы 8 күнүгэр оскуола аактабай саалатыгар Герой Н.С. Степаноа аатынан Бүлүүтээҕи 3 №-дээх оскуола бастакы директора Виктор Николаевич Яковлев 80 сааһа туолуутун көрсө "Ыллыктаах үлэм суолунан" диэн кинигэтин сүрэхтэниитэ буолан ааста. Улуус, куорат администрациятыттан Клара Валериановна Гаврильева, Матрена Антоновна Саввинова, үөрэҕирии начальнига Маргарита Николаевна Куличкина, педколледж директора Семен Викторович Иванов, Чернышевскай нэһилиэгиттэн баһылык Артур Николаевич Протопопов уонна үөлээннээхтэрэ, бииргэ үлэлээбиттэрэ, үөрэнээччилэрэ, улуус оскуолаларыттан директордар, оскуола ветеран учууталлара кыттыыны ыллылар. Кинигэни билиһиннэриини Л.Я.Кононова иилээн-саҕалаан ыытта. Кинигэни билиһиннэрии иккис түһүмэҕинэн В.Н.Яковлевы 80 сааһынан чиэстээһин буолла. Оскуолаҕа өр сылларга бииргэ үлэлээбит үөлээннээхтэрэ, эдэр көлүөнэ үлэһиттэр, ыалдьыттар Виктор Николаевичка эҕэрдэ эриэккэһин, баҕа санаа бастыҥын анаатылар, ырыа-тойук дьиэрэйдэ, көрү көҕүлүттэн туттулар, оонньууну оройуттан ыллылар. Дьоро киэһэни М.П.Сивцева, А.П.Сыромятникова, Л.Р.Мальцева иилээн-саҕалаан ыыттылар.
|