Тохсунньу 20 күнүгэр "Саха саарыннара" региональнай НПК биһиги оскуолабытыгар буолла. Конференцияҕа Ньурбаттан, Сунтаартан, Үөһээ Бүлүүттэн уонна бэйэбит улууспут оскуолаларыттан 460 оҕо уонна 30 улахан киһи 17 хайысхаҕа кытынна. Бу конференцияҕа үөрэтэр кылаастарым: 5б, 6б, 7б, 8б уолаттарын барыларын бөлөҕүнэн хоһоон ааҕыыга бэлэмнээн киллэрдим. Ону таһынан дакылаат ааҕыытыгар 5 оҕону икки секциянан бэлэмнээтим. Онон бу конференцияҕа "Саамай элбэх оҕону бэлэмнээн кытыннарбыт учуутал" диэн номинация баара буоллар, арааһа, онно тиксиэхтээх эбиппин. Хоһоон ааҕааччыларым бөлөхтөрө миэстэҕэ тиксибэтилэр. 5 кылаас уолаттара саха саарына, биир дойдулаахпыт, народнай поэт Михаил Тимофеев айымньыларынан "Төрөөбүт дойдубар" композицияны үөрэппиттэрэ, куһаҕана суох аахтылар. 6 кылаас уолаттара "Герой Н.С.Степановка" диэн хомуур хоһоону аахтылар. 7 кылаас уолаттара саха саарына, народнай поэт И.М.Гоголев - Кындыл "Ийэ тылбар" поэматыттан бэлэмнэммиттэрэ. 8 кылаас уолаттара тоҕус хомуһуннаах хоһоонтон Алампа "Төрөөбүт дойду" хоһоонун аахтылар. Ахсыстар "Төрөөбүт дойду" курдук уустук айымньыны ааҕыыга кыахтара тиийбэтэ, кыайбатылар диир кэрэгэй буолуо,  кыһалла сатаатылар, кыаллыбата. Оҕолор ааҕыыларыгар кыаллыбатах биричиинэлэринэн ыалдьа сытар оҕолору аҕалан аахтарыы, элбэх оҕо ыалдьа сытара уонна урут ааҕыллыбыты хатылаабакка барыта саҥаттан үөрэтии буолан ыарахаттардаах буолла диэн сылыктыахха сөп.  

       Дакылаакка Михайлова Марина (11 б кылаас) 8-11 кылаас үөрэнээччилэригэр "Олоҥхоһут Василий Осипович Каратаев - саха саарына" уонна Тараховскай Вася (5 б кылаас) 5-7 кылаастарга "Олоҥхоһут Доропуун - мин хос эһэм" үлэлэринэн бастакы миэстэ буоллулар. Волков Айаал (6 б кылаас), Корякин Женя (5 б кылаас), Майоров Вова (5 б кылаас) кыттыбыттарын туоһулуур сертификакка тигистилэр. Марина, Айаал, Женя уонна Вася - бары биир секцияҕа кытыннылар. Үлэлэрэ барыта олоҥхоһуттар тустарынан. Онон биир секцияҕа икки оҕо миэстэлэһиитэ - бу эмиэ улахан ситиһии буолар.