Балаҕан ыйын 14 күнүгэр П.И. Быканов аатынан Халбаакы орто оскуолата тэрийиитинэн норуодунай поэт И.М. Гоголев - Кындыл Уйбааҥҥа аналлаах I улуустааҕы "Кындыл көмүс күһүнэ" тэрээһин Гоголевтар олоро сылдьыбыт, Халбаакыга бастакы оскуола турбут сиригэр Лаҥхаҕа буолан ааста. "Кындыл көмүс күһүнүгэр" Халбаакы оскуолатын оҕолоро, үлэһиттэрэ, төрөппүттэрэ уонна И.М. Гоголев - Кындыл аатынан Чочу, Герой Н.С.Степанов аатынан Бүлүү орто оскуолаларын үөрэнээччилэрэ, учууталлара кытыннылар. Биһиги оскуолабытыттан бу тэрээһиҥҥэ барыта 17 оҕо уонна 4 учуутал кытынна. Оҕолору үс бөлөҕүнэн "Таптыыр сахам тылынан...", "Күһүҥҥү тыал...", "Саха тыла", учууталлары "Саха ийэ иһитэ" литературнай дьүһүйүүлэринэн кытыннардым. Тута хоһоон айыытыгар кыттаммын 30 кыттааччыттан 2 миэстэни ылан, оскуола оҕоруотун күһүҥҥү бэлэҕинэн, хортуоскалаах хаппыыстанан, мэҥэ суругунан наҕараадаланным. Бу тэрээһиҥҥэ ситиһиилээхтик кыттыбыппытыгар махтанан, оскуолабыт остолобуойугар биир куул бэйэлэрин оҕоруоттарын хаппыыстатыттан биэрдилэр. Оскуола баай матырыйааллаах музейын олус дуоһуйа, астына, кэрэхсии көрдүбүт. Маннык тэрээһиннэргэ кыттыы, айаннааһын оҕолору сомоҕолуурун, бодороһуннарарын таһынан айан педагогикатыгар иитэр-үөрэтэр өрүтэ күүстээх. Айаммыт ороскуотун төрөппүттэрбит, тэрийээччилэр өрүс уҥуоргу өттүгэр автобус көлөнөн хааччыйаннар, сырыыбыт табыллыбытыгар тэрийээччилэргэ, төрөппүттэрбитигэр, көҥүллээн ыыппыт оскуолабыт администрациятыгар улаханнык махтанабыт.
|